2001年今日，美國9.11恐襲後美股復市，道指大跌7.1%；7年後，2008年9月15日，雷曼兄弟爆煲引發金融海嘯，我好記得呢一日，因為我的兄弟做了雷曼的兄弟；又7年後，今時今日，儲局議息今晚要捱眼瞓到凌晨兩點，睇吓會唔會10年來首次加息，7年魔咒又會唔會再應驗。
議息前夕，市場主流睇法係今次唔會加息，美股隔晚大升，亞太區股市昨日全線造好。內地A股尾市一小時突然發威，收升4.9%，報3152，帶動港股收升2.4%，報21966。
中金所連番調高持倉按金、收緊異常交易門檻後，嚇走投機盤，導致成交萎縮，以滬深300期貨為例，交投銳減99%。由於滬綜指重上4500前，券商自營坐盤持倉唔可以沽貨，若投機盤走晒，券商現有約5,000億元自營盤就難覓交易對手對沖，面臨倉位全裸風險！
精熙逢回吐吸納
港股經過連月捱打後，唔少股票跌過龍，部份公司有感自家股票被低估，就出手回購，提升每股收益及每股資產淨值，以穩定股價、增強信心。我近日就在回購股中尋寶，心水係精熙（2788）。
精熙係光學零件製造商，以產銷數碼相機零件為主。上月公佈中期少賺26.3%，每股盈利0.32美仙，約2.5港仙，派中期息0.451美仙或3.5港仙。公佈業績後兩周，公司展開新一輪回購，由8月26日迄今，每個交易日都回購，佔每日成交超過一半，支持股價回升。
由於數碼相機日漸被智能手機的攝影功能取代，精熙開始兼營其他高級電子產品零件，開拓盈利增長點。雖然業務乏善可陳，但精熙向來資本開支低，又擁有強勁的經營現金流，並保留大量現金，可持續派高息及回購。
精熙2006年2月10日以每股2.2元上市，睇歷年數簿，年年賺錢，雖然前年中期試過見紅，但只係廠房及機器折舊的賬面數字，期間現金流仍為正數，全年埋數仍有錢賺。向來無寶不落的David Webb，舊年1月28日增持精熙至超過5%的須予披露水平，現時持股6.06%。
精熙現時持有淨現金超過9億元，每股淨現金約1.1元，無銀行借貸，但市值只係7億元。昨收0.87元，PE 18倍，息率12厘，每股NAV約1.37元。今輪在0.83至0.89元間回購，由於有高息及回購支持，可逢回吐吸納。
割柑人
本欄逢周四刊出