練馬師徐雨石向來當正谷草係自己主場，呢晚贏馬一不離二，第三場起用師徒黃皓楠減十磅勝出「故事」，第四場四班1000米，轉與柏寶合作搏殺得手，子彈馬「創出商機」藉一檔之利，以最佳跑法貼欄跟前，直路很快透出帶到，季內初出即以2.8倍大熱門身份取勝。
「創出商機」最特別是四隻腳有三隻是白色，雖已七歲年紀唔輕，但一連四季初出都冇W有P，保持季初特佳本色，累積五冠九亞三季佳績。柏寶騎佢更係一絕，事關人馬跨季連續四戰合作兩冠兩亞冇甩Q。
今場二、三名由12檔女馬主曾向欣愛駒「悅欣賞」及11檔「創意寶」分別取得，第四名係韋達座騎吳廐「聖驛善」，四重彩18,467元。
呢晚早段場次沈集成馬房好黑，第二至四場「秋月春風」、「杰歡騰」、「悅欣賞」全部屈居亞軍。
石哥表示「創出商機」早前因為柏寶未能試閘，所以才請鄭雨滇主試，結果當天馬兒試閘一放到底，走勢悦目，石哥坦言當時睇到呆咗。石哥表示由於馬兒試閘走勢真是太犀利，因此今仗有點信心，幸運地抽一檔起步，加上馬兒與柏寶非常夾，遂順利取勝。