【銅鑼灣→尖沙嘴】89年亞姐冠軍翁虹自嫁給第二任老公劉倫浩兼生女後，一家三口定居內地，最近翁虹返咗香港，前日下晝4點幾，記者喺銅鑼灣利園見到翁虹約咗吳麗珠high tea，佢坐低就傾到唔停口，仲皺晒眉頭似吐緊苦水，之後佢哋去搭港鐵，撞正放工高峯期，月台排滿咗好長人龍，佢哋等咗四班車先上到，逼入去仲好辛苦，翁虹表現得唔耐煩，不停問吳麗珠：「點解唔搭的士呀？」
原來佢哋去尖沙嘴會合男友人食越南嘢，其他朋友陸續到達，見到佢哋食蛋糕，離去時翁虹攞住紮花走，原來今日係翁虹嘅47歲牛一，但就唔見老公出現！雖然翁虹青春不再，但外表都keep得唔錯，不過，可能佢離開咗香港娛樂圈太耐，搭港鐵時冇乜人認到佢，反而去到尖沙嘴就好多男人回頭望：「呢個咪翁虹。」
採訪：攝影：徐錦池、畢紹基、潘冠恩
