時間過得好快，22歲港女見習騎師蔣嘉琦，已經喺香港跑過兩次賽事，騎過7隻馬出賽，攞到兩次亞軍，包括「會心微笑」以及「駕悅」，其中「駕悅」輸畀細佢10個月嘅黃皓楠座騎「友瑩養」，開出一條見習騎師連贏位。嘉琦BB暫時為座騎取得38萬獎金，佢自己就大概佔兩萬蚊。
始終嘉琦BB經驗尚淺，陣上發揮難免不及一啲男性猛將，唔少評論認為佢騎「會心微笑」放得太快，否則應對頭馬更有威脅，而另一匹座騎「駕悅」跑第二之後，馬會更喺賽後報告毫不留情，彈嘉琦唔夠決斷，冇把握機會將「駕悅」向內移入，令隻馬冇遮擋走外疊蝕位嘥力。
不過嘉琦嘅師姐，已掛靴10幾年嘅江碧蕙，仍對師妹嘅前景感到樂觀：「佢比我哋以前幸福，佢喺海外受訓，有海外出賽經驗，呢啲經驗帶番香港，信心當然較大，我祝佢前程似錦，有機會喺香港欣賞賽事時，會為她打氣。」
嚟緊本周六(19日)嘉琦又再出賽，亦係佢將功補過嘅好機會。戰馬「尊皇速龍」上場喺嘉琦胯下起步零零舍舍包尾，失去先機，搞到直路姍姍來遲，空有強橫後勁亦追唔切三甲不入。不過嘉琦嘅師傅呂健威就維護徒弟，認為慢閘係隻馬問題，而非嘉琦手忙腳亂，所以周六唔會換人，「尊皇速龍」將再配嘉琦，仲話有信心可爭勝喎。
除了「尊皇速龍」，嘉琦BB本周六還有「跑寶貝跑」、「勁飛揚」、「有意思」共四匹座騎。