大企業搞大型社會公益項目，幾乎已成指定動作。渣打有渣馬、港鐵有競步、滙豐有golf、新地有跑樓梯。總之人有我有，每間企業，各豎旗幟，大搞盛事，但求省靚招牌。
係盛事自然要宣傳。唔知點解做這一類宣傳，多數是規規矩矩，老老土土。是搞手唔夠creative，抑或是怕搞得太出位，會被人抽水抽出禍？好似跑樓梯，宣傳見得最多的，就係參與者一副開心樣跑樓梯，然後是專家教路跑步秘訣，再加一句「快啲嚟支持下啦」! 唔好意思也要講句，呢類宣傳手法，其實相當舊式，幾多網民會睇完後開心「些牙」？
今時今日在海量資訊的網絡世界做宣傳要突圍而出，最最最重要就是content。一句到尾，內容才是殺着。你所post的內容是否吸人眼球、能否與受眾互動，甚至產生viral效果，先至緊要。如果搞完一輪facebook大龍鳳，才得幾廿個like，當中仲要唔少是公司同事，互聯網慘變內聯網，意義何在？
今期要一讚新世界維港泳宣傳，他們飛甩老土，網絡廣告令人眼前一亮。一系列水着facebook post，由謝安琪BB豬到男神王宗堯、重量級欣宜和魯芬、財經達人施永青、神奇小子曹星如，總之各路人馬，造型獨特，齊齊落水。一張相，勝卻大堆叫人參加渡海泳的老正文字，出來的效果就是一個字：型，令人忍唔到手share。「型」都只係表面，真正要讚，其實係背後的深層次策略。以前的渡海泳，是游水叻的人才關心，今日連唔識水性的胡孟青和達哥也落場影埋一份，強烈訊息是：唔理你係咪水怪，維港泳預埋你。
今次又是digital宣傳好例子，網絡行先，紙媒殿後。先是網上攻勢，如此多名人濕身落水，自然引來財經、港聞、體育、娛樂版爭相報道，令宣傳達至更多接觸面，由online到offline。與其浪費光陰搞無聲勢宣傳，不如多花心思度條網絡好橋，告別老土，殺出重圍！
文廸晞
mailto:[email protected]