講開里昂論壇，里昂前年都曾經邀請「萬人迷」碧咸來港做演講嘉賓，風頭一時無兩。佢離開球壇後，的確魅力依然，利邦（891）噚日公佈，成功同碧咸簽約5年，萬人迷將參與利邦旗下男裝品牌Kent & Curwen嘅產品開發、宣傳等，刺激利邦股價大升五成。
碧咸嘅消息公佈前，利邦市值只得11億元，公佈後股價爆升，噚日市值升到17億，換言之，碧咸呢個名至少值6億元。有份合作、同樣屬於利豐（494）馮氏家族旗下嘅利標（787），股價升6%。
眾所周知，碧咸同利標行政總裁樂裕民（Bruce Rockowitz）老友鬼鬼，家陣利豐、利標與利邦三間公司有錢齊齊搵，簡直將碧咸嘅價值放到最盡。不過，粉絲如果想買咸爺有份設計嘅新衫就要等等，公司話，「碧咸牌」男裝最快明年秋冬季面世。