機管局今年首次搞創新科技展覽，運房局局長張炳良自然要捧場。今次約有20間公司參展，早排一個用相片分辨相中人年齡嘅app熱爆，咁啱其中一間本地startup「SenseTime」都有開發類似嘅人樣識別技術，局長即場試吓。
系統除咗會識別年齡，仲會憑表情估下相中人心情，仲有個相貌吸引力「顏值」評分，年過60歲嘅張炳良影咗兩張相，第一次開心表情，顏值68分，系統估佢得41歲。再試多張淡定樣，年紀近番啲有54歲，顏值迅速提升到84分，高分過唔少年輕少女行家。但講到最上鏡要數機管局行政總裁林天福，佢簡單一個淡定表情，顏值有成90分，認真駐顏有術。
講返個系統，負責人話識別面孔能力準確度達99.53%。喺國際人臉識別比賽打低過facebook同google研發嘅同類系統，難怪機管局都想合作，如何將識別技術用喺安檢同人流管理。