金象米成為近日網民熱話，人人偵探上身，研究呢個曾經標榜係「頂上泰國香米」嘅牌子，點解包裝唔再印「泰國」兩隻字（圖）？有人更估係貪平用咗中國米。金源米業噚日出聲明，指金象米主要成份係泰國茉莉香米，但由於一年得一造，所以要喺唔同地方採購，適時調校配方去維持品質，強調「絕無中國米」。為免消費者誤解，公司喺2010年已經負責任咁刪除「泰國」兩字。
消費者委員會總幹事黃鳳嫺補充，現行法例冇規管食米必需標示出產地，反而生產商如果標明食米係產自泰國、日本，咁就要受《商品說明條例》規管，唔能夠用其他產地米取代。佢話唔少食米生產商都會混合唔同產地食米，話咁樣會比較有口感喎，所以消費者買米前，最好睇清楚包裝標籤喇。