麥當娜將於明年2月首度襲港開騷，火速掀起圈中人撲飛熱，不過亦有藝人冇興趣。
【去】
林二汶：
我想撲16,888蚊嘅套票同哥哥一齊去，試吓可唔可以摸到麥當娜隻腳。其實16,888蚊可以做到好多嘢，供樓交租、三日四夜泰國都夠玩，萬幾蚊睇concert都算係人生一個神奇經驗。
謝安琪：
讀書時都係聽麥當娜，當然有興趣睇啦，會約一大班同學買2,488蚊普通價嘅飛。
楊千嬅：
都好期待，好欣賞佢毅力、功力同心態，做藝人係馬拉松人生，佢由形象、外形、音樂到演出感染力，真係冇嘢可以講。
胡杏兒：
都想睇，因為好難得，貴啲都值得，我都要問吓朋友點撲飛，如果有6、7張就最好。
孫耀威：
知佢台灣同香港都有做，睇吓邊度平啲同攞到好位，台灣最貴飛要3萬新台幣，成7千幾港紙，我check咗有個紀念勳章、唔公開嘅寫真集同坐第一行，我都會為本寫真集去搶㗎。
森美：
成萬幾蚊一張飛，唔係我杯茶，價位2,000幾蚊都OK，因為始終都係一代巨星，以前成日話米高積遜嚟香港，但到佢離開咗都嚟唔到一次，呢啲錯失確實返唔到轉頭，所以都值得睇，同大班朋友回想那些年嘅party，十幾人一齊去擺甫扮跳舞step，隻手擺嚟擺去，享受逝去那些年嘅日子。
【唔去】
黃秋生：
冇，好少睇演唱會，而且最近好忙。
蔡卓妍：
未有計劃，因為忙緊年尾Twins演唱會。
黃偉文：
過去已經喺唔同地方睇過四次麥當娜演唱會，今次香港演唱會座位咁珍貴，就留畀仲未睇過嘅朋友吧。