港股近月跌到散晒，樓市、商舖、零售市道又好似山雨欲來，睇嚟香港明年經濟唔慌好得去邊，打工仔當然最緊張自己份工作穩唔穩陣喇。臨近年尾，通常走去買本明年運程書八卦吓，不過唔睇猶自可，麥玲玲嘅猴年運程書竟然加價近9%，係咪諗住市場需求急增，乘機加價先？
麥玲玲解釋，過去3年，佢本運程書都維持58元，即使發行商一路話紙價成本上升，佢都唔肯加，只係廣告費越來越貴，今年單係隧道口嘅戶外廣告收費已經升咗15%，佢唔想縮皮，惟有加價。佢笑住話，加價都要講意頭，諗住「三三不盡，六六無窮」，66元好似太貴，咁咪加到63元喎。
佢仲爆料話，蘇民峰嘅猴年運程書應該都會加價。不過蘇民峰今年本運程書已經賣緊62元，李丞責嗰本仲貴，賣78元。睇嚟財運最佳嘅，都係幾位出名風水師囉。