入行3年嘅林德信（Alex）終於第一次做男主角！佢喺新導演梁國斌套新戲《死開啲啦》擔正，佢演一隻沉睡百年嘅殭屍，因為土地問題，地產商要開發土地，令沉睡嘅佢蘇醒。Alex接受電話訪問，講到新戲有場瞓棺材戲，佢話覺得感覺新鮮：「嗰場戲係喺第一日開工嘅第一場戲，瞓棺材嘅感覺好凍，因為拍嘅時候開始轉涼。副棺材係道具，做演員就係可以有機會做一啲平時做唔到試唔到嘅事，所以冇覺得唔吉利。」Alex仲話：「當晚開工發燒，瞓住拍先至冇咁辛苦。」
全家睇戲畀評語
喺外國長大又鬼鬼哋嘅Alex係接受西方教育，唔覺得大吉利是，佢仲話估唔到做殭屍係有福利，Alex話：「因為殭屍都算係一個死人，所以每日開工都收利是，開咗兩個月工收咗都超過20封利是。」由於套戲就快上畫，所以佢心情七上八落，之前佢都講明話叫晒闔家撐場，睇吓佢做成點。
Alex仲話戲入面佢係一隻好殭屍，只會吸雞血，識咗吳浣儀同J.Arie呢對嫲孫後，發現張繼聰同盧覓雪係被地產商收樓搞到無家可歸嘅殭屍，於是Alex就幫佢出頭。
撰文：馮仁昭