「新界王」劉皇發之子劉業強早前「繼位」做鄉議局主席，唔少人質疑發仔鎮唔鎮得住場？鄉議局噚日開執委會，屏山鄉委會主席曾樹和忽然提臨時議程，話發仔要「考牌」，要求對方就新界村屋僭建問題再向政府交涉：「你做阿頭，做大佬，啲細佬跟住你俾人打到仆街，點跟你呀？」佢笑言之前跟鄉議局去井岡山上國情研習班，學到革命精神喎。
發仔全程笑笑口冇搭嘴，發仔姑丈薛浩然則開腔解圍，話鄉議局有人可以「直達天庭」，因為副主席張學明係行會成員，個個星期都見到梁振英，連發叔都冇機會咁近距離。講完一大輪，當然冇結論；唔知被點名嘅張學明，點睇呢場大龍鳳？