終審法院日前由炮台里1號遷至昃臣道8號，香港郵政本月30號特別發售以「終審法院」為題嘅郵票小型張以及相關集郵品，以作紀念，今日起發售正式首日封，每個賣$1.2。
呢款郵票小型張，係以終審法院內部設計概念圖為依據，以終院法庭作為主體設計；左後方背景係終院登記處同圖書館，左前方則係立於大樓上代表公義嘅希臘泰美斯女神（Themis）雕像。郵票上以線條勾劃嘅終院外觀，同郵票小型張右上方嘅司法機構標誌，可謂互相呼應。郵票小型張及相關集郵品今日起會喺郵政總局、尖沙嘴郵政局、荃灣郵政局、沙田中央郵政局同屯門中央郵政局展出。