其貌不揚嘅蝙蝠，畀人恐怖兼不吉祥嘅感覺，但係原來喺中國社會中，「蝠」與「福」同音，蝙蝠其實代表福氣，連中國古代嘅龍袍都會繡上蝙蝠圖案。金鐘亞洲協會香港中心最近同中大文化研究所文物館，合辦「別有洞天：蝙蝠之旅」嘅展覽，展出70多件以蝙蝠為主題嘅傳統中國文物；細小如碟，隆重至龍袍，器物好似如意等，均一樣搵到蝙蝠嘅蹤影。
中大文物館副館長許曉東博士話呀，中國古代人重視福氣，所以好多日常嘅生活用品，都佈滿蝙蝠紋。展期今日起至明年1月，長者殘疾人士半價，學生或18歲以下免費入場，部份日子免費入場，喺亞洲協會香港中心麥禮賢夫人藝術館舉行。