長和（001）主席李嘉誠早年參與唔少細價股投資，其中一隻叫中國資源交通（269），2013年認購公司一批今年到期嘅可換股債券（CB），不過公司上月底公佈，超人決定放棄行使兌換權利，換言之，超人決定唔玩，CB到期連本帶利收番錢算數。
超人唔玩，多少影響公司部署，結果中資交通上周停牌話要供股，噚日聯交所資料顯示，上周三另一大孖沙鄭家純旗下新創建（659）斥資4億元入股中資交通，持股量7.4%。咁都未止，有鄭氏家族「御用經紀」之稱嘅鼎珮投資同日斥資約3.8億元增持呢隻股，兩者加埋持股超過19%。
按公司網站，中資交通主要喺內地經營收費高速公路，喺內地與南美洲擁有森林資源，純官究竟睇中公司乜東東呢？