【銅鑼灣】今年28歲嘅香港拳王曹星如（Rex），兩個幾禮拜前喺會展舉行嘅拳賽，以技術性擊倒澳洲拳手畢荷伊，職業生涯紀錄即刻變為18戰連勝，將世界拳擊理事會（WBC）超蠅量級亞洲冠軍嘅頭銜攞到手，認真可喜可賀。
今年1月先結婚嘅曹星如，曾經喺婚禮公開多謝老婆Laam一直嘅支持，又話同老婆以前拍拖時，因為成日要喺外地練習，好少時間陪佢，唔知係咪因為呢個原因，曹星如結咗婚就將空閒嘅時間留晒畀Laam，前日下晝5點幾，本報就見到佢同Laam拍拖喺銅鑼灣利園商場COVA飲咖啡，兩公婆仲全程雞啄唔斷，咖啡飲完就手拖住手離開，似足啱啱拍拖嘅小情侶。
採訪、攝影：梁繼光