香港人最鍾意買磚頭保值，名廚余健志（Jacky Yu）都唔例外。噚日佢出席一個樓盤活動時透露，佢早於97年金融風暴前買樓，第一次係買丁屋，後來商廈、住宅乜都有，全部都係用作收租之用，同埋放埋一邊等佢哋升值。
可能佢費事大家幫佢計身家，點都唔肯透露總共持有幾多個物業，淨係話主要都係大型屋苑嘅中型單位。
講到今日樓市，Jacky都認為，家陣樓價太貴，脫離一般人嘅負擔水平，所以佢𠵱家唔會入市。至於發展商近年成日推售蚊型單位，雖然適合上車客，但佢就嫌太細，一定唔會考慮。
咁就當然喇，佢咁早置業，手持物業組合𠵱家市值唔講得笑，都無謂博喇。