領展（823，前稱領匯）改名之後，依然避唔過俾人投訴嘅命運，今次仲唔係有小商戶投訴咁簡單，而係有銀行向銀行公會投訴，指領展唔畀呢間銀行喺領展旗下商場開分行，幾咁大件事呀！
領展行政總裁王國龍收到風，就即刻做嘢，寫咗封信畀銀行公會解釋，大致都係話，領展一向歡迎同支持銀行界為社區提供服務，並會全力配合云云，仲提供埋數據指，旗下150個商場有76間銀行分行，較10年前增加咗20間。而將於今年第4季重新營業嘅黃大仙中心北館（前稱龍翔廣場），都會有3間銀行分行。消息人士點都唔肯透露，領展唔畀面邊間銀行，只係話並非中小型銀行喎。