「事既無奈何，你話點就點，一百兩黃金我不要，留得春桃來見證……」
細細個，家中古老唱機旁，45轉、90轉唱片寥寥，頗記得蕭芳芳、王愛明等演唱國語兒歌集，《漁光曲》、《滿江紅》、《江山美人》、《客途秋恨》、《文姫歸漢》，桃麗絲黛、皮禮士利、法蘭仙納杜拉、康妮法蘭西絲……
至聽得人家牙癢癢，還是《胡不歸》，媳婦上海妹被惡家婆半日安（戲後，現實生活中，佢老公）趁乖仔出征乘機逼休，後生女唔識世界，義正詞嚴……教壞人，乜嘢叫做「一百兩黃金我不要」啫？傻女，至緊要人財兩得啊！
人（春桃）要，黃金更加要，只嫌咁小一百兩。古老年代，女人除非父家收容，除卻客死異鄉，絕無退路，另有一條路──做雞！
就算出家做師姑，梗係冇聽過《帝女花》之〈庵遇〉，佛門那有清淨地？明爭暗鬥一樣講勢利。
扯得越去越遠，到底乜事？
原應講近期家鄉元朗大熱：Yoho Mall。阿妹發試業首天排隊人龍，自新元朗中心過天橋照片至家人群組，真箇人山人海水洩不通。她評：班鄉下佬雖然身家沒過億都九千萬九，就係未見過世面！
回應：一架B1巴士，自落馬洲口岸過百人，幾乎5分鐘一班車，多少內地恩客有數得計，還未算B2運客自西部通道呢？西鐵呢？276、276P自上水運來羅湖口岸客呢？
當然上面Yoho山（點止Town？平地起高樓，Yoho簡直是一座人肉山）住客皆優質消費者，新鴻基租務部推廣助理總經理Helen Chan 話：Yoho住客是生意中流砥柱，堅客！
問我：但願泥有機、山常青、水長涼、朵朵白雲飛向我家千年故鄉！
桑海滄田，世事人心，小撮我聲音，如何將巨變狂瀾挽？
難道打橫瞓街將發展巨輪轉彎？我身長六呎，條路闊過廿呎……冇嘢講，講完！
元朗從千百年前水中之塱而明清老鎮而墟巿，周邊人口快過百萬，過去隸屬元朗管轄屯門建Mall不下二十年不知幾興隆，元朗呢？元朗廣場興旺，但貨價不高勢未足。新元朗中心，做極不起，縱使西鐵元朗站一旁。
其他？少不更事。
發展勢頭已展開，無奈何，不如要求做得好，做得旺，做得人人喜歡人人讚。這 Yoho Mall只是冰山一角，日後更加膨脹，期望做到沙田新城市廣場，有口皆碑，至起碼IKEA、city'super，不用久候出現三聯、誠品、HMV、Page One一天光晒，切勿唔湯唔水，既浪費良田阡陌，又與民生水乳不交融！