身在澳洲訪問嘅政務司司長林鄭月娥，喺墨爾本嘅活動認真多籮籮。除咗參觀皇家兒童醫院，視察設施同了解醫院嘅服務及運作，亦到訪由工業廢墟重建而成、舉行多元化活動嘅墨爾本濱海港區。原來林鄭2008年做緊發展局局長時，都去過呢個區參觀；舊地重遊，佢大讚發展神速，並參觀咗濱海港區嘅圖書館同阿提哈德體育場。咪以為林鄭去圖書館係睇書，佢其實係去參觀館內嘅3D打印。
林鄭喺濱海港區周圍騰，無非係想取經，佢話政府想將九龍東轉型，由以往嘅工業心臟地帶變成另一個主要商業區，濱海港區就係值得借鏡嘅成功例子。林鄭今日參觀完墨爾本大學，下午就轉往坎培拉。