香港樓宇密集，天台綠化除了為枯燥嘅城市帶來生氣，仲可以減慢樓宇天台防水層老化。中電前年同「樹博士」港大地理系講座教授詹志勇合作，喺將軍澳嘅變電站天台種咗全港最大嘅「空中樹林」出嚟，天台連大樓外牆垂直攀藤植物總共有520平方米咁大，種左80株、32種本地原生樹木，有代表香港嘅洋紫荊、土沉香及紫藤。
原來一般樓宇天台大約10年就要鏟起啲混凝土，翻新防水層，以免屋頂漏水。綠化後嘅天台有植物遮蔭，加上多層結構令防水層減慢老化，即係綠化天台唔止可以令大廈降溫，仲可以令天台防水層用耐啲。
但詹志勇話市民對天台綠化有唔少謬誤，「好多人驚會壓壞個屋頂，但其實香港嘅工程師都跟英國標準，啲樓好硬淨，普通嘅草本植物同灌木都承托到」。若市民想於天台種植，可先問屋宇署同工程師意見，了解承重能力，再決定植物品種。