自從特首梁振英連郁兩個局長，整走原民政事務局局長曾德成、以及原公務員事務局局長鄧國威，梁振英要連任嘅機會似乎比以前大大看淡，梗係啦，正如一政界花生友所言，政府管治要暢順，必須得到愛國愛港陣營喺外圍做啦啦隊，以及做實事嘅公務員幫手力推，如果裏、外都得罪晒，仲有邊個肯幫CY賣命、有乜政策可以推動到，所以唔少人都認為CY呢趟自掘墳墓。
嬲爆炒人冇規冇矩
花生友原本都以為，炒人事件都過咗近兩個月，公務員應該下咗啖氣啩，點知一同公務員提起呢單炒魷事件，唔少公務員依舊咬牙切齒，餘怒顯然不消。其實佢哋嬲嘅、未必因為撐鄧國威，而係冇規冇矩到呢個地步，據聞炒人風波後，唔少公務員比以前更加蹺埋對手，橫掂做得多未必有好結果，尤其是CY根本唔信公務員。
有公務員同花生友話呀，其實公僕真係幾難同CY合作，因為對方一開波已經覺得佢哋係搞對抗，成日阻頭阻勢，既然係咁梗係大條道理印印腳免孭鑊。有公務員話，自從CY上場後，工作上幾乎係零滿足感，以往都會有啲政策獲市民支持，但𠵱家梁班子無論推出啲乜，市民都係用有色眼鏡同陰謀論去睇，往往好事都會變咗壞事，最終只係令公務員白忙一場。聽完佢哋大吐苦水，唔知阿爺欽點下屆特首時，會唔會重點考慮公務員係咪肯同特首合作呢一點？
花生友
周二、四刊出