過去3個月，乜嘢最難忘？八方覺得政改敗局收場當然上榜，而港大嘅副校長風波，都一定有份，網民似乎都同八方意見相近，雅虎香港（Yahoo）分析過去3個月港人喺搜尋引擎搜索最多嘅關鍵字，發現人稱鐵醫嘅港大教授盧寵茂喺港大副校風波中一跌成名，榮登第三季「十大熱門搜尋抽水風雲人物／機構排行榜」榜首，瞓低都贏成日喺fb圖文並茂狙擊特首梁振英嘅自由黨田北俊！
雅虎香港喺新聞稿話喎，鐵醫嘅抱膝倒地照，令網絡出現一片改圖熱潮；而喺fb抽過鐵醫水嘅美麗華旅遊則躋身亞軍，排第三嘅則係寸人改圖都好出眾嘅「100毛」；反而不時向689、葉劉同其他建制派抽水嘅田北俊，拳拳到肉卻只排第六，喺才子陶傑同藝人何韻詩之下，唔知田毛毛會唔會更加喺fb勇往直前？
「等埋發叔」潮爆語No.1
因為政改風波，我哋學識「等埋發叔」，此金句喺網絡嘅威力亦勢如破竹，以大熱姿態勇奪「十大熱門搜尋潮爆語」首位，緊隨其後嘅係建制派甩轆收場後令人大嘆「不怕神一樣的對手 只怕豬一樣的隊友」。八方數過，十大潮爆金句中，立法會主席曾鈺成連中三元，佢話後生幾年都想選特首「睇你點整我」；鬧有人炒咗佢細佬曾德成後放風嘅舉動係「蠢人做蠢事」，以及被揭政改表決期間以「賊來了」形容陳偉業，令佢成為第三季政治金句王。
李八方
mailto:[email protected]