祥哥鄧永祥過咗身都有18年，佢4個仔女兆尊、小艾、兆榮同碧玉相依為命，雖然永祥大廈已經賣咗畀東華三院，但佢哋𠵱家都係租番嚟住，平日就靠金融投資搵吓錢。
花萬幾蚊睇醫生
馮仁昭噚日喺灣仔撞到小艾，閒談間佢講起件勞氣事，佢話：「幾個月前我喺旺角一間寵物店用2萬蚊買咗隻豹貓，點知唔夠一個月就病，帶隻貓睇獸醫先知係腹膜炎，貓一有呢個病，死亡率係好高，我都使咗萬幾蚊醫佢，但都冇乜起色。」小艾覺得貓咪有病就唔應該賣畀人，佢仲返到貓店要求退錢，小艾話：「寵物店唔肯，只肯換一隻貓畀我，但講真我對佢間貓店失去信心，只要求換貓狗糧，但佢哋都唔肯。」最終寵物店收番隻貓但冇作出任何賠償，小艾話考慮去消委會投訴呢間寵物店，而且以後都唔去幫襯。
咁小艾𠵱家養咗幾多隻貓狗？佢話：「我養咗12隻狗，貓就冇養啦！兆尊就養1狗5貓，妹妹碧玉就養咗8隻波斯貓，碧玉學緊貓狗讀心術，可以同動物溝通到，佢𠵱家教到屋企8隻貓好聽話，食飯會一個個排隊等，唔會打交爭食，又教識佢哋閂櫃桶。」
撰文：馮仁昭