聰明絕頂、深得家族生意董事長歡心的小友說，有時開會，見所謂高層的姨媽姑姐低b反應慢，會忍唔住反白眼，一聽，捧腹大笑，做得朋友果然一擔擔，同Mary以前一模一樣！
以前每聽見老闆講：「快啲幫公司度個signature event啦，好似渣馬咁呢！」Mary一定嘴角一扁、雙眼一反，嘴裏唯唯諾諾，心裏媽媽叉叉，知唔知自己講緊乜？錢不去說它了，願意投資多少年等收成先？想即時見效，唔好即收？咁算我冇料，唔該另聘高明好了。
就如年前見冰桶挑戰成功，又逼人諗條可以有咁宏大效力的viral橋，咁你不如叫無綫捧多個梅艷芳出來啦！
不過上周某天，忽見多張水底照在社媒瘋傳，Mary真的眼前一亮了──先見謝安琪、欣宜，後來才知還有魯芬、曹星如、青姐、施生、筋肉消防員……仲有Mary最鍾意那幀曾鈺成香蕉水上飄，嘩，用水底靚相宣傳維港泳，切題，條橋又正，啲相靚到呢，而且似乎可以長玩長有，心中不禁喑暗喝采！
再看清楚，原來是AllRightsReserved出品，唔怪得知啦，維港大黃鴨、海運的百隻叮噹、快閃紙熊貓都是其得意傑作，單單超級吸睛，唔到你唔服。
真的很喜歡這個水底campaign，可惜的是當Mary以為水底名人陸續有來，campaign竟似無以為繼，有曹星如，點解唔影埋英雄輝？有曾鈺成，其實何不也拍攝長毛，甚至等埋發叔仲得。有魯芬，其實不如也捕獲發哥，叫他在水底開茶檔，同食客selfie……真係冇想過兩日就好似出晒所有相，campaign只擾攘數天便斷纜，嗯，其實係咪仲有㗎？
彭瑪莉
mailto:[email protected]