今年底娶新抱嘅金利豐（1031）老闆娘朱李月華（朱太），心情勁靚，噚日以保良局主席身份出席活動時，被問到想抱幾多粒孫，佢即刻笑到蓮子蓉咁話：「我想好似籌款咁，多多益善，越多越好」。不過，佢可能驚住嚇親新抱仔，隨即補多句話「年輕人有打算㗎喇，我諗生兩至三個喇」。
朱太嘅寶貝仔朱俊浩（Kingston）將於今年11月同女友羅之琦結婚，喺灣仔會展筵開過百席。朱太透露，阿仔與女友𠵱家跟wedding planner、設計師傾緊，密鑼緊鼓，「女家幾多人，我自己金融界都好多合作夥伴，會幾熱鬧㗎」。佢又好坦白咁講，自己得一粒仔，冇諗到呢個婚禮預算要幾多錢，總之大家開開心心就得。咁即係不設上限喇！