【訪問】
近年樓盤奇則湧現，本以為是地產霸權「賺到盡」的極致，從創業板轉主板剛滿月的建築師行思城控股（1486）主席梁鵬程指奇則造價比四方則更貴，地產商未必有着數，畫奇則「要有啲勇氣」。
石屎外層需訂造
卓能集團（131）荃灣盤「壹號九龍」頂層兩伙特色戶圖則酷似米奇老鼠、太古（019）OPUS「扭紋柴」設計雖矚目，但弧型設計難放家具，實用率奇低。任建築師逾30年的梁鵬程指，「奇則」的石屎外層需特別訂造，造價較高，地產商「自己要計掂數先」，通常出自精品型發展商，為求獨特，一間起兩間止，「要有啲勇氣，我都希望見到呢啲客」。尖沙嘴The ONE亦出自梁鵬程手筆，回想華置（127）「一開始唔係起呢種樓」，在寫字樓、酒店之間反覆變動，直至敲定東京銀座風格，歷時6、7年，「講得客氣啲，公司唔會賺幾多錢」。為吸引人流，當初建議由尖沙嘴地鐵站興建隧道通往商場，「做唔做係一回事，計唔掂數」，但過程有趣，同事樂在其中。
思城負責內地不少大型城市規劃，行政總裁符展成指中港在美術、產品質量要求各異，客戶和建築師「互相選擇，有所為有所不為」，安全底線不能妥協，寧棄生意。本地藍屋、美利樓、舊立法會等保育項目，思城都有份參與，符氏兼任城規會成員，他慨嘆本地尚未有機制平衡私人業權及保育，建築師可從中「賣橋」使設計包容各方意見，但必需「各個角色行多步」。
記者：黃翹恩