舊年因雨傘運動而停辦嘅「港鐵競步賽」，噚日朝早再次喺中環遮打花園舉行，一如以往吸引唔少政商界名人參賽，除咗有即將於年底退任嘅港鐵（066）主席錢果豐，當然仲有運動型嘅行政會議成員陳智思喇。
身穿白色背心、藍色短褲嘅陳智思，配上佢全神貫注嘅表情，淨計姿勢分都贏晒，加埋佢少鹽少糖嘅健康飲食習慣，令佢健步如飛，喺比賽組別摘下第三名。
63歲嘅錢果豐雖然一頭白髮，但絕對稱得上神采飛揚，一邊競步一邊微笑，玩得咁happy，唔知佢退任之後，仲會唔會繼續參賽支持呢？
另外，華華發現到，港大校委會主席梁智鴻疑似冇遵守大會規則，着咗西褲、皮帶參賽，冇遵守比賽服裝要求「所有運動員須穿着短褲，不得遮掩膝蓋部位」嘅規則，仲要有部call機夾喺皮帶，唔知係咪做醫生真係慣咗on call 36小時呢？