財雄勢大之莎莎老闆郭少明家族之「美麗」系馬，踏入2015年後馬運唔算太好，今季開鑼日「美麗之星」便在特首盃熱門落第，不過「美麗」系馬呢日再於盃賽出擊，結果於第九場一班1400米廣東讓賽盃，告東尼訓練、郭能操刀之「美麗大師」以5.7倍捧盃。
四歲愛爾蘭自購馬「美麗大師」，在港累積11戰四冠兩亞兩殿一第五，僅兩次冇獎金，毫無疑問將會成為告東尼馬房今年國際賽之爭分主力，此駒同時保持1400米非冠即亞，百分百入Q。
另一邊廂，方嘉柏呢場存心以轉倉初出馬灰色神獸「和順超影」力圖省招牌，與「美麗大師」鬥得難分難解，無奈拉士何澤堯騎輸給郭能，「和順超影」影相輸鼻位屈居亞軍，不少人認為此駒冇運，皆因潘頓若非養傷，他騎「和順超影」應可取勝，如今則開出上季經典一哩賽翻版Ｑ。不過「和順超影」比起上季尾，表現明顯翻生。
「和順超影」贏唔到，點都好過另一匹灰馬「大印銀紙」，2.1倍大熱門「大印銀紙」直路騎落一滴都冇落第，連帶韋達亦繼續孭鑊，跑完第九場仲未有馬贏。
呢場三、四名分別係「貳寶」同「萬事勇」，前駒衛冕廣東讓賽盃落空，四重彩15,260元。