諗都諗唔到，開季最強練馬師竟然係近年一直沉淪之孫達志，佢試過兩季因頭馬唔夠數收警告信，今季再唔夠數就會出局。所謂知恥近乎勇，孫達志冇受到早排晨課跌落坑渠受傷之影響，今季一開鑼即瘋狂進攻，繼之前兩戰各贏一場後，呢日頭場五班1600米，即憑大熱門「晨采」再下一城，連續兩次日賽先拔頭籌，馬房攞晒彩。
原本42戰不勝之處女馬「晨采」，馬主郭偉雄連同同主「蜜圈」今季換綵衣，由粉紅色變為黑色，果然行好運，「蜜圈」開鑼日入Ｑ，「晨采」今仗更加以八歲高齡開齋，在莫雷拉胯下2.1倍大勝，一早已收韁，跨季近六戰全入前五名，足以成為孫廐另一得意之作，
孫達志說：「『晨采』以往常排大外檔，影響發揮，今仗終於抽得內檔，賽前我特意安排牠兩次試閘，操到馬兒的狀態fit一fit才上陣，牠喜歡在較快的場地展步競賽，今日的場地有利牠，加上對手甚弱，有利爭勝。結果贏馬距離甚遠，希望不要加太多分，牠適合沙田及快活谷，但沙田場地較快更為有利。」
今場二至四名順序係「兄弟醒」、「南華勇將」及「頌義」，四重彩4,406元。