洪永城（Tony）同劉心悠噚日喺銅鑼灣出席活動，Tony接受記者訪問前，忽然煞有介事問在場傳媒：「係咪全部都係我可以接受訪問嘅傳媒？」突然咁驚青，好可能係同無綫上星期出咗個內部指引有關，指引再次強調禁止旗下藝人接受壹傳媒訪問。
事緣Tony早排去北韓拍旅遊節目《在那遙遠的地方．北韓》，但節目真實性受到質疑兼引起爭議，之前《壹週刊》記者都特登去追訪佢，不過訪問之後，無綫就出內部指引喇！而事後有人解畫，話係《壹週刊》記者自稱係其他雜誌記者。
公司叫小心
有片有真相，成條訪問片喺《壹週plus》播番出嚟，結果證實記者根本冇自稱係第二間雜誌。Tony噚日繼續死撐：「其實係當日現場我聽到佢話係呢個周刊，不過我唔想講太多，對雙方都冇乜益處。」佢仲自辯好光明正大，公司都冇特別照肺，只係提醒佢以後要小心啲。講到佢喺北韓打電話畀女友唐詩詠報平安，不過對方好似仲未公開認佢做男友，Tony就笑話女仔係怕醜啲。
撰文：馮仁昭
