本月28日是雨傘運動一周年，去年為挺學生站出來的何韻詩，自運動結束後，她亦約滿離開寰亞唱片轉做獨立歌手，以雞蛋撼高牆，並宣告展開「十八種香港」行動，繼上月於灣仔伊館開騷後，阿詩昨日實行落區第一站——「有種香港叫——電車」。
有人認為老舊的東西已沒價值，行路都可以快過電車，所以，阿詩就刻意揀電車做落區第一站，日前她在facebook留言：「就等我們登上車廂，沿着從舊日留存到今天的軌跡，用我們的眼睛證實它的價值，大力刻下屬於我們自己的香港路線圖。」號召六十位菇徒一起出發，走入我城。
化身車長打飛
「有種香港叫——電車」於昨午3時許在西環屈地街出發，素顏阿詩打扮樸素做回一個普通人，乘坐最舊款的電車沿站遊走，阿詩還拍片貼上facebook直擊，留言：「今天，電車軌上，出現一隻何濟菇。」到北角站接另一批菇徒時，她化身車長並時光倒流負責幫乘客打飛，網友留言：「哇！經典『打窿機』都出埋，好耐冇見！」有粉絲更坐電車沿途追蹤阿詩，逾十多位粉絲跑過馬路等偶像合照，十分驚險。
阿詩除跟菇徒分享傾偈外，又在電車上開音樂會，除唱出自己的歌曲，更刻意演繹組合Shine的金曲《燕尾蝶》，她說：「歌詞有少少感嘆，係咪要將我哋所有嘢攞走，先可以建設新嘢！呢隻歌講我哋城市一直變遷，究竟係咪要追上步伐，定係用自己節奏行番，呢樣要自己搵答案，要珍惜我哋城市，珍惜我哋嘅地方。」阿詩在電車上開音樂會，網友勁讚：「百幾年嚟第一次，勁呀菇！」
採訪、攝影：黃曉程、畢紹基