都唔記得上一次睇香港隊踢波係幾時咯，十年、二十年？全無記憶，但自九月四日開始，俾家中年輕人刺激起嚟，連睇兩場香港隊直播，第一場當然係在深圳對中國隊，香港以弱對強，兼且作客，最合足球邏輯嘅戰術就係死守，英超流行講法就係「泊巴士在禁區」，力阻對手入球，一於和波當贏。香港隊又幾好運噃，中國隊全場圍攻香港，射門不知多少次，但居然起碼有四次射中門柱，令國足隊無法入球，卒之零比零賽和。老實講，呢場係低水準賽事，海軍鬥水兵而已，中國隊雖佔盡優勢，但射門技術實在差勁，破門板斧又少，若對着亞洲一綫球隊如日本、南韓、澳洲，應該輸梗。
好嘞，港隊守和中國，士氣更盛，在九月八日主場對卡塔爾，惹人憧憬，事前記者G要左丁山估賽果，左丁山話卡塔爾贏三比零！哈，幾乎靈過鬼，卡塔爾真係射入三粒。呢場波左丁山全家提早返屋企食晚飯，食完就坐在電視機前，圍觀直播，一開波就見客隊圍攻主隊，香港球員困守自己半場，直情捱打，無論在傳球技術、身高、速度方面，全部輸晒，打到下半場近85分鐘，已輸足三球，左丁山算係目光如炬嘞啩！
點知足球是圓的，港隊此時知道大勢已去，拚死無大害，改踢高Q大腳靠湧戰術，此乃以前英超升降機屈福特、溫布頓兩隊嘅踢法，有波就吊埋對方禁區博懵。原來卡塔爾隊以為大局已定，有啲掉以輕心，守衛又好似唔慣英式橫衝直撞嘅打法，突然被港隊兩個外援黑人球員逼到散散地，兩分鐘內連失兩球，香港追回二比三，當其時也，豈止旺角球場球迷瘋狂，左家也有叫聲此起彼落，情緒高漲，希望港隊在補時最後階段入多一球。但對方教練係歐洲人，經驗豐富，立即連環換人，拖延時間讓己隊球員唞氣定神，減少慌張，跟住就打「謀殺時間」慢慢踢戰術，令港隊無時間發動攻勢而保持勝果。
賽後分析就係卡塔爾實力較高，贏得合理，對中國隊還可看高一線，但呢三隊波，講真，有乜資格踢世界盃呀？點同德國、阿根廷、巴西較量吖，直情差咗幾皮。在亞洲，呢三隊亦無希望。不過在北美洲以外地區，足球係最大之社會凝聚力，一支水皮香港隊都足以令香港人高喊We Are Hong Kong，忘記彼此間嘅分歧。曾俊華好嘢呀，下半場現身旺角球場，與球迷同呼吸同叫喊，梁振英邊度敢呀。