受讓十磅之見習生俗稱十磅仔，近年同類騎師在港渴市幾近絕跡，黃皓楠上季加入戰團，十磅仔得以重新應市，今季再有女將蔣嘉琦以相同身份出道，為十磅仔加添唔少氣勢。
結果呢日第五場四班千四米，罕見開出一條十磅仔連贏位，21歲黃皓楠接手上季尾由潘頓跑第二之葉廐馬「友瑩養」，一檔起步後沿欄越放越順，就此直領到底5.9倍建功，鞍上人連同第三場勝出方廐「爆炸糖」在內，今日開齋兼起孖，兼自製一口未勝馬孖寶。
至於同「友瑩養」串Q嘅正係黃皓楠師妹，亦即係比皓楠仔大10個月之22歲新晉女見習騎師阿Kei蔣嘉琦。阿Kei策騎師傅呂健威之落飛馬「駕悅」，雖然追唔到師兄之「友瑩養」，但卻頂住巫斯義座騎「但求上舖」跑第二，兩駒串成12倍Ｑ。巫斯義繼第三場騎「神舟小子」影相輸畀黃皓楠「爆炸糖」做二奶後，再一次受制於十磅仔，呢場更加只得季軍，認真甩鬚。今場第四名由湯智傑夥拍126倍大冷「通勝」拎到，四重彩91,776元。