湖北有一位90後攝影師王源宗，花咗一年時間，在西藏歷經千辛萬苦，自資拍攝一部《西藏星空》風景片網上播放，畫面非常罕見。結果央視一句「唔該」都冇，就剪咗放在自己紀錄片中，當係央視自己拍。王源宗9月10日打電話給央視，投訴侵犯版權，要求央視支付版權費用。但工作人員竟然回答，「央視用你素材又怎麼了？」言下之意，央視用你條片，應該覺得好光榮。又話要搵湖北公安，調查王源宗是否敲詐國家機關。
王源宗將工作人員談話錄音放上微博，全國網友譁然，結果央視要出聲明道歉，話該工作人員只是實習生，又話有關片段係由工作人員淘寶買番來，並非故意要盜版。但對於是否支付版權費用，仍是冇提。
而家內地傳媒已經撤銷有關報道，王源宗微博上講，雖然央視已經公開道歉，但至今不單冇賠償，而且仲不斷有湖北政府人員上門施加壓力。件事其實非常醜陋，央視作為全國最權威電視機構，視版權如無物，仲想以官方身份壓榨受害人。
不過，淘寶在其中角色，就更加耐人尋味。王源宗用一年時間拍《西藏星空》搵命博，費用超過20萬元人民幣，但淘寶上賣盜版，四元就有交易。馬雲會否不惜得罪央視，洗脫淘寶係盜版王國污名？
黃尹華