【科健籽：食養東西】
踏入九月，除秋意漸濃外，月餅戰亦進行得如火如荼。近年飲食界各出奇謀，有聲稱健康的代糖製月餅，或用上卡通人物作招徠，花多眼亂揀到頭都暈。作為精明消費者，當然不會被靚包裝盒呃到，是次請來營養師吳耀芬（Kathy），教你睇食物成份及營養標籤揀月餅。
市面上月餅口味琳瑯滿目，惟食物標籤統一，識睇食材及營養標籤就絕無走雞。近年開始興起選用代糖而製的代糖月餅，是噱頭還是真正低糖？Kathy解釋：「代糖月餅採用木糖醇或麥芽糖醇，但仍有白糖調味，要再睇營養標籤定奪。香港法例規定，100克食物中含低於5克糖才是低糖，以奇華麥芽糖醇月餅為例，100克只有約2.4克糖，算是合格。糖尿病人亦可選擇此類低升糖指數（食物經消化後對血糖升幅的指數）的代糖月餅，但要注意減糖後澱粉質亦高，少食多滋味。」普遍月餅的食物標籤會以四分一個月餅計算，重量不足100克，而食物安全中心指引均以100克作單位，參考前要謹記換算。
另外，以養生作招徠的棗泥月餅又是否真正健康？Kathy指：「棗泥含高果糖，再加白砂糖調味後，含糖量與傳統月餅相若，小心中伏。檢查糖份時，應以代糖為首選，冰皮月餅果餡內所含的果糖亦可接受，但應避免選擇只供熱量而毫無營養的白砂糖。」
首選代糖月餅 奶黃月餅塞血管
傳統月餅出名多油，但看似乾爽的奶黃月餅亦唔輸蝕，Kathy解釋：「食物標籤根據用量多少而排，油份排越前就代表用油越多。常用油份中，最健康係伍仁月餅內的堅果油，含有不飽和脂肪，可通血管。而傳統月餅，應選不含膽固醇的花生油，比較健康。近年新興的、以牛油作餅皮的奶黃月餅，多加入含反式脂肪的牛油，會令壞膽固醇上升，堵塞血管。」最終Kathy仍是推薦代糖月餅：「總括而言代糖月餅最好，其次係伍仁月，再者係脂肪較低、但糖份可能高的冰皮月餅。最差當然係四黃白蓮蓉，單個鹹蛋黃含0.3克膽固醇，已達健康人士一日可攝取標準。」
進食月餅後，應於日常飲食中平衡熱量：「健康人士一日可吸收30克脂肪，即2湯匙油。一個傳統月餅有8湯匙，不應食多於四分一個，正餐時亦應減食半碗飯，平衡四分一個月餅的澱粉質。另外，月餅不宜久放，高油份氧化後會產生自由基，有侵害細胞、導致癌症的風險。」
傳統月餅VS代糖月餅
1.大部份月餅的食物標籤會以四分一個月餅為單位（46.25克），食物安全中心指引均以100克作單位，參考前需換算。
2.代糖月餅使用木糖醇，四分一個月餅含1.1克糖，每100克僅2.4克糖，符合香港法例對低糖的標準。傳統月餅糖份含量則比代糖月餅高十多倍。少食多滋味。
中秋節食滯 山楂金桔解膩
註冊中醫師楊明霞推薦免煲消脂代謝茶，內有蓮葉降血脂，更有山楂金桔健脾開胃。
消脂代謝茶
材料：蓮葉3錢，山楂3錢，金桔2個
做法：將蓮葉剪碎，洗淨所有材料，放入杯中茶隔內。注入500毫升熱開水，蓋上杯蓋，焗30-40分鐘即可飲用。
記者：楊麗珊
攝影：楊錦文 徐振國
編輯：李寶筠
美術：孔文彬