西甲巴塞隆拿嘅美斯話你知咩叫人逢喜事精神爽！啱啱再為人父嘅美斯，後備上陣踢咗17分鐘就射入絕殺球，帶領巴塞喺上周六晚嘅西甲大戰以2:1反勝馬德里體育會，開季保持全勝！呢場波巴塞上半場圍住馬體會嚟攻，但都無功而還。而且仲俾對方嘅費蘭度托利斯喺51分鐘先入一球，呢球係佢對上14次對巴塞入嘅第10球，真不愧為「巴塞殺手」！不過，巴塞只係用咗四分鐘就憑住尼馬射入靚罰球追成平手。
美斯後備入替搞掂
呢場波嘅主角「球王」美斯喺60分入替拿傑迪錫，雖然佢因為代表國家隊同埋等待囝囝出世，成個星期只係同巴塞隊友操練過一次，但佢只用咗17分鐘就入波，反勝對手！美斯入波之後仲做啜奶嘴動作慶祝，將入波送畀新囝囝馬迪奧，場面真係夠晒溫馨喇！至於贏咗波之後嘅巴塞就以三戰三勝繼續排榜首，佢哋更加成為西甲歷史上第一支連續四季都取得開季三連勝嘅球隊。
雖然美斯「弗」到爆，但係巴塞陣營就有壞消息傳出。上季做咗成季「文員」嘅中堅華美倫喺呢場波再一次受傷，賽後證實要休息一個月，對於一向後防球員緊絀嘅巴塞嚟講真係幾大鑊。而華美倫唞咗成季之後今次又要長唞，睇嚟佢要去黃大仙求求轉運喇！
C朗母子high爆
至於美斯嘅死敵、皇家馬德里嘅基斯坦奴朗拿度（C朗）就喺同日爆發。佢喺上周六作客愛斯賓奴嘅西甲比賽連入五球之餘，仲交出助攻，打破自己入球荒兼幫皇馬大勝對手6:0。踢完呢場之後，C朗超越名宿魯爾，以230球成為皇馬史上西甲入球王。最近C朗因為狀態差而受到各方抨擊，佢可以鬆一口氣喇！C朗嘅媽媽同孫仔都好戥佢開心，佢媽媽首先上載一段扮C朗入波嘅片上ig，之後仲有一段片係佢同小C朗一齊慶祝C朗入波，睇嚟C朗同美斯真係場外都要鬥溫馨！
