作為練馬師，為咗增強兵力向大賽進軍，個個都希望得到富豪馬主加盟，貴為盃王兼每季馬房獎金過億嘅大摩，不少馬迷都知他暑假認購了愛爾蘭自購馬Consort。此匹司徒德爵士馬房三歲馬，至今四戰得兩冠一亞一季，今年六月中，在轉播賽皇家雅士谷1600米一級賽聖詹姆士皇宮錦標，以譯名「團結一致」之名跑第三，只輸畀歐洲最佳三歲馬之一的「教堂峽谷」及「洛恩港人」。
灰馬「團結一致」據悉由摩仔喬治成功以千多萬收歸旗下，目標當然係明年香港打吡大賽，好多人有興趣想知道，究竟摩氏家族會以甚麼價錢，轉售給那位香港馬主，家陣終於名花有主，就係高伯新馬房最重要支持者潘蘇通。
呢個消息可謂震撼馬圈，事關潘蘇通近年幾乎係高伯新嘅私家馬主，今次缺口被大摩打開，無論係大摩搵潘蘇通支持，抑或潘蘇通主動睇中匹馬，對大摩陣營而言，都係一次重大外交勝利，而「團結一致」亦會好快抵港。
高伯新現時必須做的，當然係要訓練好潘蘇通的三大高班良駒「大印銀紙」、「大運財」及「王者無敵 」。其中「大印銀紙」周日(13日)出爭廣東讓賽盃，家陣咁嘅情況，隻馬鬥志只會更強，「大印銀紙」在港兩戰1400米全勝，當然係主要爭勝分子。其實對高伯新都冇乜大不了，只要交出佳績，相信未來潘蘇通仍肯科水買貴馬入高廐，就算大摩想獨霸潘蘇通，機會亦唔高。