都話呢期楊千嬅紅到爆㗎啦，《五個小孩的校長》藍光一出，昌哥已WhatsApp話銷情好好，預留咗隻碟畀龍叔叔。Sorry呀千嬅，呢個禮拜有隻重量級到爆炸嘅game 《潛龍諜影》出咗，淨係睇吓呢個專欄名，就知龍叔叔有幾愛呢隻game，就算Iron Man嚟咗都要行埋一邊啦。
PlayStation靚女公關一早send咗隻game畀龍叔叔，礙於保密協議要等到呢個禮拜先出得試玩報告，都好嘅，玩耐啲寫得更有feel。顧名思義，《潛龍諜影》系列（下稱MGS），就係玩一個「潛」字，偷襲、暗殺、潛入等等，用盡一切手段，總之目的係鬼鬼祟祟深入敵陣救人或KO指揮官。玩咗咁多集，都叫練就一身「潛龍」功夫，以為嚟到新作輕易「啅」硬佢，點知今集改玩mission形式，仲要係open world世界，即係好似RPG咁一大片地圖畀你任縱橫。故事設定更係阿富汗同非洲等沙漠地帶，就算有隻馬仔騎下，每個mission都係山長水又遠，玩玩吓覺得自己似毅行者多過潛入者。冇所謂，今集畫面喺PS4上靚到核爆，高低起伏嘅山頭、彎彎曲曲嘅路、漫天山頭嘅花花草草等，都做得好豐富好像真，仲要keep到1080p/60fps，跌frame情況極少，快速奔跑、鏡頭擺動會細緻順滑得多，有耳水不平衡嘅人都冇咁易暈。除咗睇到PS4嘅超強運算能力，遊戲背後嘅Fox Engine程式架構更係顯出功架，咪俾《GTA》、《COD》呢啲鬼佬engine威晒先得㗎。
講番個open world，由於每次空降地點都離目標有不短距離，架直升機丟低你之後就拜拜你條尾，由得你一人一馬孤單咁企喺沙漠度。跟住去邊？做啲乜？真係聽少陣簡報都唔掂。遊戲最好玩嘅地方就係鬼祟，不過幾乎每次深入敵陣之前，都會經過大大小小嘅哨崗，即係要花一輪時間摸清敵兵位置、巡邏路徑，好部署暗殺順序。可能龍叔叔真係唔慣大地圖玩《MGS》（上集既online對戰地圖簡直蚊髀同牛髀），每次都未殺夠一半，總會俾更鬼祟匿埋嘅敵兵發現，響晒警號call晒機咁通知同僚，跟手成班人湧埋嚟，冇得玩暗殺啦，焗住拎起支機槍嚟個大屠殺。為乜要逼我殺人呢？儘管龍叔叔玩之前隻《Peace Walker》，有本事全mission無傷無殺Rank S爆機，今次都要舉手投降。
例牌惡搞情節夠豐富
今集系統大顛覆，除咗open world發展劇情同攻略mission外，仲有一個經營作戰基地嘅副玩法。呢個嚟自PSP 《Peace Walker》嘅Mother Base建造系統，會隨住資源同俘虜數目而日漸壯大，開發更多武器、培訓人才靠晒佢。雖然耗費玩家更多嘅心機同時間，不過睇住個基地不停擴建，喺海中心一站一站咁起，又真係幾有滿足感。比《Peace Walker》更優勝嘅，係主角Big Boss可以喺大到無倫嘅Mother Base周圍走，你可以想像一下，十幾個鑽油台咁嘅基地連埋一齊，又係另一個行到PK嘅大地圖，何其壯觀啊！最好玩係每個基地都有特別嘢，射擊訓練、醫院鬼古劇情、睇博士做機械人、參觀動物園等，又係豐富到爆嘅遊戲編排。
當然，《MGS》之父小島秀夫最出名係惡搞，好似長期作戰唔沖涼會俾人捉去坐監、馬同狗都係上戰場嘅partner、又索又「偉大」嘅狙擊手、會跟番玩家生日而出現happy birthday劇情等，屢屢見到「小島神」嘅心思，冇外國啲射擊game咁硬派奄悶，難怪連IGN、GameSpot等有權威嘅網站，都畀9分甚至10分滿分嘅超高評價。
最後係龍叔叔吐吓苦水，因為今集的劇情交代薄弱咗好多，加上主任務同副任務眾多，仲要經營基地，搞到好多高潮戲都唔能夠一氣呵成，有種散收收嘅感覺。最大鑊係據聞劇情明顯被閹割過，Chapter 2之後就完，根本唔似一個結局，一眾網民陰謀論，睇死Konami出DCL（付費下載），仲未計online嘅FOB對戰又係玩付費，畀一隻game嘅錢換嚟「半成品」，konami食相都幾難睇，近乎玷污咗隻王牌作品，難怪小島神要離開呢間公司啦。
Profile：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。（ http://www.facebook.com/uncle.dragon.movie ）
編輯：謝慧珊
美術：楊永昌