巴黎聖日耳門（PSG）上周五法甲喺主場俾波爾多逼和2:2，跨季13連勝正式斷纜。佢哋呢場波冇為周中歐聯留力㗎，除咗伊巴謙莫域休息外，排出強陣迎敵，以貴價加盟嘅迪馬利亞仲首次喺聯賽正選上陣。可惜前鋒卡雲尼繼續神勇，包辦兩球都冇用，因為門將奇雲查普派膠兩次送禮，累PSG失兩分。
白蘭斯不滿全隊表現
所謂「日防夜防，家賊難防」，有邊個估到最後偷走PSG兩分嘅，竟然係佢哋今夏新簽嘅德國門將奇雲查普？佢就犀利囉，首先喺防守角球嗰陣「彈琵琶」，直接將個波拍入網，幫對手追平1:1；之後仲喺比賽末段接應隊友回傳時控唔實個波，俾對方嘅卡斯里偷到再射成2:2，搞到PSG喺打多一人、仲有七成控球率下都要失分收場！查普咁搞法，激到入球功臣卡雲尼都躁咗，喺完場前同對手講手領黃。
PSG教頭白蘭斯賽後冇太過怪責查普，但就好唔滿意球隊表現：「球隊攻守方面都做得唔好。就算我哋最後贏咗，我都唔會改變諗法。」相信PSG上下𠵱家都唔係好開心，除咗後備門將沙華托尼施利古；施利古今年俾查普搶咗正選，𠵱家見到查普咁派膠法，睇怕佢有機會落場表演吓喇啩！
收支平衡獲UEFA解禁
PSG禮拜二就會喺歐聯迎戰瑞典嘅馬模，計牌面應該可以重回勝軌嘅，而且佢哋仲收到個好消息沖沖喜！歐洲足協（UEFA）財政控制調查委員會啱啱確認，由於PSG同曼城喺2014同2015年都達到財務收支平衡，佢哋將會撤銷對兩間球會嘅各樣限制。其中PSG上屆喺歐洲賽由原本25個變咗只能註冊21個球員；𠵱家取消限制，輪換球員就更得心應手啦！
