中港世界盃外圍賽大戰，香港隊成功嘅防守，令對手中國隊點射都射唔入，除咗全隊上下一心專注防守，當然仲有上晒身嘅香港隊門將葉鴻輝啦！不過賽後就爆出中國隊隊長鄭智喺比賽期間，開口鬧港隊門將葉鴻輝係狗，仲疑似向對方吐口水。之不過鄭智前日受訪反指，當時只係上前叫葉鴻輝起身繼續作賽，仲話葉鴻輝詐傷倒地，拖延時間，係違反體育道德嘅行為。嘩！賽事輸贏固之然好緊要，估唔到場內場外球員之間嘅火花都爆得好緊要。有見及此，填詞人金冠軍都即席揮毫作咗首《好波好報》，搵嚟城中熱爆人物英雄威、弱智合唱。