旺角場妳細細粒，但細得嚟又幾warm嘅，周圍都係人四圍都係聲，亂咁坐又得，行行企企亦可。坐爆六千幾座位，作為香港波嘅指標啱啱好。紅旗出現，唔使好似世盃四年一度咁疏，而係打工仔年曆上面紅假嘅一年十次八次，踏實而快樂好多。
原本想讚妳呀旺角場，但諗起妳原本坐八千幾，改頭換面後變咗家陣六千幾嘅荒謬，邊有人越擴建越細㗎？係坐得舒服咗定泊車容易咗，用家最清楚。
環繞旺角場嘅茶餐廳是澎湃的，大家可以唔幫襯，但佢哋嘅存在確保球迷唔會餓親，兼想吹幾耐得幾耐。問題就係妳太隨傳隨到，唔似對面海丹麥熱狗咁賣完拉閘，唔珍貴囉。
妳四通八達易聚易散，三幾分鐘地鐵火車巴士乜都到，但冇咗大球場條長命斜畀大家趕頭趕命，自製唔到朝聖氣氛囉。更無謂提妳個喇叭嘴嘞，因乜細聲不特止，啲聲仲拆嘅，連鴨寮街都唔收，一班耳朵唔靈敏嘅叔叔嬸嬸想跟住唱國歌都唔得啦。
仲有樣嘢我本來唔想提，喂，因乜你個廁格永遠冇人沖廁㗎，唔係一個唔沖呀，係一個接一個叠住上唔沖呀，趕住出去睇波呀？又唔見對面海個大場係咁，扺妳俾人睇唔起㗎有時。嗱我建議管理無方嘅妳斬住腳趾先，逢國際賽禁止球迷「開大」，免得國內外球迷有樣學樣，甚至變本加厲。
唔關妳事？唔好儍啦旺角場，家陣有乜衰嘢唔係入妳數㗎？座位少係妳唔識招呼人，坐得近易搞事係妳管教無方，坐得唔夠grand係妳唔夠大體。越睇妳個衰樣，越似隔籬屋個黃面婆，認命啦妳，妳老公有頭有面係唔會返嚟飲湯㗎！幾時先返？等出面阿靚靚要招呼太多情夫，又要錫住自己羽毛唔畀麻甩佬亂咁踐踏嗰陣，就有機會輪到妳嘞。
KEYMAN
節目主持