曾幾何時，出過唔少灰馬名駒，好似七、八十年代嘅「祿怡」，八、九十年代嘅「及時而出」，以至近代仲有「奔騰」，都成為唔少馬迷心目中嘅偶像。
今期賽事都有唔少灰馬列陣，包括頭場「頌義」、四場「吉利高」、五場「包裝騎士」、七場「吉祥」同埋第九場廣東讓賽盃一對「大印銀紙」同灰色神獸「和順超影」，後面一對明星馬，當然成為全日焦點，可唔可以包辦呢場盃賽嘅一、二名，絕對是大家談論話題所在。
然而講到機會，第七場「吉祥」更值得留意，呢匹灰馬上季轉投呂廐後，贏嗰兩場馬大家都有目共睹，今期改跑泥地，原來呢匹馬響英國時，曾經響膠沙地三戰，拎到一冠兩位佳績，可見今場跑泥地唔係熱身咁簡單。
另外，頭場「頌義」上季尾最後一仗大冷跑第四，証明已開始成熟，四歲馬今場降到第五班，有權一擊即中。