九月三日放假一天，可能係今年特別假，明年未必再有。此乃政治假期，為大家早上睇電視直播北京閱兵而設，2016年9月3日無閱兵，香港就會唔放假，何故抗戰勝利60周年唔放假，70周年就放假？71周年放唔放假？北京政治風向難測，連抗戰勝利紀念日假期也要靠估，此乃中國社會主義特色也。
閱兵之日，晚上還有文藝晚會，李碧華講及嘅晚會唔知係唔係無綫翡翠台直播嗰個呢？當晚有朋友來短訊叫左丁山睇，話有林子祥唱「男兒當自強」，於是轉台睇無綫，林子祥已唱完，聽其他「歌手」（不是歌星），不知是從那裏爆出嚟嘅，唱得麻麻，節目沉悶，典型無綫慳錢慳力搵水節目，真不知與抗戰勝利紀念有何關係。今時今日，仲搞30年前模樣嘅文藝晚會，搵誰嚟睇呀，中聯辦嘅統戰部門與特區特首辦心戰室唔換上21世紀思維，年青人根本唔會理你哋㗎！90後大學生理乜嘢？學生豪係一個例子，九月五號佢與同學去咗亞洲博覽館睇Maroon 5，佢話當晚全場爆滿，大牌樂隊例牌遲到早退，遲開場，早收工，唱咗個半小時就曲終人散，但啲粉絲似乎冇乜怨言噃，全晚歡呼不絕，學生豪話好好睇，觀眾絕大部份係20歲至30歲之間，容祖兒已是大家姐級數。好似學生豪呢類人物，博覽館現場多的是，對佢哋講抗戰勝利歷史呀，一定將佢哋悶到瞓着覺。
容祖兒就快在紅館開演唱會，一票難求，但對學生豪呢批講英文多嘅後生一輩，並無好大吸引力。紅館由康文署管轄，全年好少檔期空閒，聽講連顧嘉煇GBS金曲之夜（續辦）都冇法子安排到日子，卒之告吹。香港目前嘅演唱場地只有四處，依場地大小分就係紅館、博覽館、會展與灣仔伊館，但都未必一定租得到，紅館俾香港本地紅歌星霸晒，另加有政治勢力社團預卜不同類型晚會。外國紅歌星就清一色在機場博覽館，例如Maroon 5，遲啲仲話有麥當娜，如果唔係有博覽館嘅話，國際級紅星點有機會來港表演吖。講到呢度又想起西九龍文娛區地皮曬太陽十幾年，至今還有可能因缺錢而半爛尾，拖累香港長期缺乏藝術／舞台／演唱場地，都唔知怪邊個。