香港足球代表隊門將葉鴻輝憑著兩場振奮全港人心的比賽成為我們心中的「英雄輝」。他昨日接受《壹錘定音》訪問，提到早前對卡塔爾的比賽中，球迷沒有放棄他們，還不斷為他們打氣，令他熱血沸騰，「覺得要做啲嘢畀香港人睇！」
難得接受訪問，英雄輝回答了很多網民提問：
問：對卡塔爾落後三球，點樣最後連追兩球咁叻仔？
答：因為喺更衣室入面，林嘉緯(港隊中場)講過一句話「冇嘢係冇可能，上一場冇人預料我哋可以迫和中國。我哋下半場會繼續踢好自己比賽，我哋仲有四十五分鐘，要全力以赴！」
問：點解會當上門將？
答：細個踢波喺朋友入面最細個，被迫負責守龍，初時都唔願意，寧願射人都好過界人射啦。但漸漸地，鍾意咗撲救嘅感覺，就繼續當守門員。
問：現實踢波做龍門，咁你平時打機鐘意打邊個位？
答：梗係做前鋒啦，入波呀大佬！
問：我冇留意開足球，更加冇留意你，直至睇過新聞截圖，著起套波衫好認真去踢每埸波，我眼變心心眼了，英雄輝，我愛你！但我是男的。
答：球場其實仲有其他隊友，佢哋都付出咗好多。除咗愛我，仲要愛佢哋啊。
問：如果你阿媽同個波一齊飛入去龍門度，你會救邊個先？
答：呢個問題，有啲難諗喎…阿媽先啦，阿媽養咗我咁多年，冇理由我為咗個波唔要阿媽。
問：你普通話程度係點？識得讀「久」、「狗」嗎？
答：我啲普通話唔算好好，只不過都未到咁差。(即場用普通話讀出「久」、「狗」)
問：你點睇特首梁振英話體育冇「經濟效益」？
答：應該冇咁差呱…我相信球迷睇完球賽後，會喺附近食肆食嘢，咁算唔算因為運動而帶嚟經濟效益呢？運動唔係做呢件事(經濟效益)，運動可以團結香港人。呢個先最重要。
英雄輝，我們當然明白，只是有些人不明白而已！
足本訪問連結： http://goo.gl/vs1ITq