南韓翼鋒孫興民喺轉會窗關閉前以2,200萬鎊（約2.7億港元）從德甲利華古遜加盟熱刺，相信好多球迷都對佢充滿期望。而佢日前就收到熱刺俾佢嘅第一個指令，就係唔准買紅色車！
話用入球證明身價
雖然熱刺呢個指示，表面上有啲「騎呢」，但孫興民就話：「熱刺嘅職員同我講一定唔可以買紅色車，因為紅色代表咗球會嘅死敵阿仙奴。聽完搞到我好鬼想代表熱刺上陣對阿仙奴！」熱刺同阿仙奴一向係英超嘅死敵，上季阿仙奴中場韋舒亞贏得足總盃後曾經唱歌揶揄熱刺，而禾確特亦曾經挑釁熱刺球迷，搞到熱刺迷鬼咁「㷫」。難得孫興民今次入鄉隨俗，相信球會上下都會好喜歡佢，話唔定仲可以成為球迷新寵兒㖭！
至於孫興民嘅英超「地標」戰就好可能會喺聽日作客對「黑貓」新特蘭上演。賽前，孫興民就先大讚新球會同主帥普捷天奴：「我好欣賞熱刺踢嘅進攻足球。我相信我喺普捷天奴手下會有更好嘅表現。」而佢對於征戰英超都好有信心，仲話自己每一場上陣嘅比賽都想入波，會用入球證明自己身價。
23歲嘅孫興民上季一共幫利華古遜射入17球，佢喺年初亞洲盃表現出色，速度同體力相當好，相信咁先吸引到普捷天奴對佢豪擲千金。熱刺開季至今，暫時全部和晒，未贏過，希望孫興民真係幫到佢哋啦！