噚日有報道話，就快做第二任爸爸嘅公民黨議員郭榮鏗（Dennis），因為心急趕住陪老婆做產前檢查，所以喺中環亂過馬路，報道仲圖文並茂到影到Dennis橫過馬路嗰刻㖭。
相信藍絲見到呢一個報道，一定相當之亢奮，可以乘機狠批Dennis衝擊法治。
不過Dennis嘅facebook專頁管理員已經解開咗亂過馬路之謎，管理員解釋因為Dennis嘅助理「唔記得提佢趕時間都要遵守交通規則」，故此對事件「感到極度悔咎」並鄭重道歉。
睇到呢到，相信唔使八方講讀者都知道，又係抽葉劉淑儀誤po身份證號碼賴助理件事水！Dennis喺認錯之餘，順手抽葉劉水，真係一箭雙鵰！