美國不敗拳王美韋達周六會喺拉斯維加斯，同美國拳手柏圖打佢職業生涯最後一場比賽，希望可以將連勝走勢增至49場。但大戰前夕佢俾SB Nation篤爆喺同菲律賓拳王帕奎奧進行三億美元之戰前，偷偷哋走去吊鹽水。
職業生涯最後一戰
38歲嘅美韋達喺周六會打佢職業生涯最後一場拳，對手係32歲美國拳手柏圖，一般估計，佢應該可以勝出呢場沉量級拳賽，成功保住WBC同WBA兩條金腰帶之餘，仲可以將連勝走勢增至49場，同自己劃上一個完美句號。喺佢以愉快心情迎接呢場比賽時，SB Nation周四就篤爆佢喺五月同帕奎奧進行三億美元之戰嘅前夕，偷偷哋進行靜脈注射，將生理鹽水同多種維他命注入身體。雖然俾傳媒出蠱惑，但佢仍死撐自己冇違規。佢喺聲言咁話：「美國反禁藥組織確認咗我冇違反內華達或美國反禁藥組織嘅藥檢指引。我好驕傲自己係一個乾乾淨淨嘅運動員。」喺三億美元之戰輸咗嘅帕奎奧好寸咁話：「家陣水落石出，我終於得到平反。」
美韋達喺最後一場比賽被指喺三億美元之戰出蠱惑，唔知冇影響佢心情，搞到臨尾香呢？呢場拳賽雖然有電視台直播，但並唔係免費，要畀288港元先有得睇，拳迷留意嘞。（now650台明日8:00am直播）