如果習慣朝早揸車經紅隧由香港過九龍，聽交通消息一定聽過「過海龍尾去到紅十字會」呢句，不過好快就可能聽唔到喇，因為香港紅十字會嘅金鐘總部噚日開始停止運作，完成佢50年嘅歷史任務，紅十字會噚日仲回顧佔領運動期間，佢哋本住人道機構角色提供急救服務，輪班時間打破紀錄。
八方仲記得，上年9.28射催淚彈之後，一直有傳政府會開槍對付佔領群眾，當時現場好緊張，因為萬一警方真係開槍，單靠佔中醫療隊未必應付到大量傷者，到時惟有靠同政府總部只係一街之隔嘅紅十字會幫手。
紅十字會噚日都喺新聞稿話，本住中立原則，喺佔領運動期間，佢哋職員同義工連續76日提供急救服務，動用急救員逾1,850人次，當中不停輪值達250小時，創咗佢哋嘅急救紀錄，強調唔理係乜嘢政見，無論係示威者定係警員，只要有急救或心理支援需要就會協助。金鐘總部關閉之後，紅十字會就搬去位於西九龍海庭道19號嘅新總部繼續工作。