自由黨榮譽主席田北俊真係facebook抽水王，佢噚日又出動喇！佢今次走入新界玩狗，係咁易po張相，然後加咗一句「訓練狼狗，我有一手」（圖），好多網民自動聯想到去特首梁振英度，咁就輕輕鬆鬆呃到過千個like，田少係咪好堅先？
田少口中嘅狼狗即係德國牧羊犬，由於呢種狗聰明、敏捷、服從性高，好多時都被用嚟執行任務，聽落去好似同某人個性有啲似。田少噚日就同幾隻狗狗一齊玩，見狗狗玩到瞓晒地、又好乖咁企定定喺田少身邊合照，相信呢幾隻狗狗同田少相當熟絡，唔似得某人咁，同田少關係相當之差。
田少嘅fb專頁管理員田毛毛真係有一手，同狗玩嘅相加句咁簡單嘅說明就有咁多like。不過識睇梗係睇留言喇，有網民反問「咁689呢？」甚至有人話「可惜狼鷹不聽教」、「幾時訓練下68狗？」網民果然好嘢。